livemarks sitemap
Կիրակի, Մարտի 29, 2020

Հայաստանում ստեղծված քաղաքական իրադրության, ինչպես նաեւ ձեւավորված հացադուլային տրամադրության  ու անորոշ ուղղությամբ գնացող ՙբարեւի՚ շարժման մասին  ՙԶարուհի՞-ն զրուցեց ԱԺ ՀՀԿ խմբակցության պատգամավոր ԿԱՐԻՆԵ ԱՃԵՄՅԱՆԻ հետ:

-Տիկին Աճեմյան,  ըստ Ձեզ՝ հանրության որոշակի զանգվածի կողմից բողոքի ձայն բարձրացնելն ու հայտնվելն Ազատության հրապարակում ինչով է պայմանավորված, ու ինչով են տարբերվում ՀԱԿ-ի եւ ՙԺառանգության՚ հանրահավաքները:

- Մեր երկրում քաղաքական մշակույթ է փոխվել, որի համար շատ ուրախ եմ: Այո, դա ՀԱԿ-ի հանրահավաքներին նման չէ, քանի որ մեր երկիրը փոխվում է ու զարգանում, ինչպես նաեւ նախագահն այլ մոտեցումներ ունի, նա շատ ավելի հանդուրժող է ու բաց է երկխոսությունների ու համագործակցության համար: Այսօրվա դրությամբ ոչ ոք չի թաքցնում, որ ունենք խնդիրներ, ոչ ոք չի թաքցնում, որ այդ խնդիրներն արմատական փոփոխությունների կարիք ունեն, այնպես չէ, որ մարդիկ հենց այնպես են դուրս եկել, նրանք ունեն բողոքի թեմաներ: Ցանկանում եմ նշել, որ փոխվել են նաեւ քաղաքական տեխնոլոգիաները, ի դեմս Րաֆֆի Հովհաննիսյանի, քանի որ նա այլ հարթության մեջ է գործում: Այդ այլ հարթությունը զերծ է թշնամանքից, ջարդելու, փշրելու, ավերելու գործընթացներից, որն իհարկե ողջունելի է, սակայն ինչ վերաբերում է այս շարժման բովանդակությանը, քաղաքական զարգացումների, շատ կուզենայի, որ ե°ւ Րաֆֆի Հովհաննիսյանը, ե°ւ իր այն մարդիկ, ովքեր պայքարում են, հստակ, կոնստրուկտիվ հայտարարություններ անեն ու գան համաձայնության դաշտ: Համագործակցության դաշտ ասելով, նկատի չունեմ ինչ-որ պաշտոններ գրավելը եւ այլն, նկատի ունեմ այն, որ եթե ցանկանում ենք լավ երկրում ապրել, պետք է կարողանանք միասին աշխատել: Պարզ է, ու քննարկման ենթակա չէ այն, որ հանրապետության նախագահն ընտրվել է, ու հենց այդ առումով դա իրավական հիմք է, ինչպես տեսաք Սահմանադրական դատարանում իրավական պահանջ չներկայացվեց, այսինքն ամեն ինչ ավելի շատ էմոցիոնալ դաշտում է, ամեն ինչ ուղղված է դեպի ժողովրդի մեջ բողոքի սրմանն ու զարգացմանը: Ես կողմնակից եմ, որ կարողանանք իրար հետ քննարկել ու եզրեր գտնել տվյալ հարցի շուրջ ու իրականացնել այն փոփոխությունները, որի կարիքը մեր երկիրն ունի:

- Րաֆֆի Հովհաննիսյանը, չնայած որ հրապարակում քվեարկություն անցկացրեց, այնուամենայնիվ, գնաց ժողովրդի ցանկությանը հակառակ ու Սահմանադրական դատարան դիմեց: Մարդ, որը ամեն օր հանդես է գալիս մի նոր ծրագրով ու հայտարարությամբ` արդյո՞ք կարելի է նրան լուրջ ընդդիմություն համարել:

- Ժողովրդի այն հատվածը, որը բողոք ունի, ինչպես ցույց տվեց իրականությունը, նախընտրական, հետընտրական զարգացումները ինքն իրեն կազմակերպվեց ու կենտրոնացրեց իր ուժերը, նկատի ունեմ հասարակությունը: Այն դեպքում, երբ ընդդիմությունը չի համախմբվում ու չի ներկայացնում որեւէ առաջնորդի, դա այն դեպքն է, երբ ժողովուրդը գնում  է այն մարդու ետեւից, ում տեսնում է  ընդդիմության առաջնորդ: Պետք է հիշել, որ ժողովուրդը չի կարող գործել քաղաքական դաշտում, ժողովրդի պահանջները` սոցիալ-տնտեսական փոփոխությունների պահանջներ են, իսկ Րաֆֆի Հովհաննիսյանը, որպես գործիչ, իհարկե, իրավունք չունի գործել այդ դաշտում, նա ավելի հստակ պետք է ներկայացնի իր դիրքորոշումները, իսկ ինչ վերաբերում է իր գործունեությանը, քաղաքական դաշտում իր ներկայությանը, 20-22 տարիների ընթացքում, բոլորս տեղյակ ենք, թե ինչպես են իրենք գործել, կարծում եմ, նրանք ուղղակի հայտնվել են ճիշտ ժամանակին ճիշտ տեղում: Նրա գործողություններն ուղղված են էլեկտորատին պահելու համար: Չնայած, չեմ կարծում, որ նրանք հստակ գիտեն, թե այս ճանապարհն ուր է տանում:

- Քանի որ խոսեցիք էլեկտորատի մասին,  արդյո՞ք, այսպես  կոչված, արմատական ընդդիմության  թեկնածու չառաջադրելու պատճառով վերջինիս հարողները գնացին  ՙԺառանգություն՚ կուսակցությանը ընտրելու:

- Ոչ միայն Լեւոն Տեր-Պետրոսյանի էլեկտորատը, այլ նաեւ այլ ուժերի էլեկտորատը ընտրեց Րաֆֆի Հովհաննիսյանին:

- Իսկ ի՞նչ քայլեր պետք է ձեռնարկի ՙժառանգությունը՚ օր օրի Ազատության հրապարակը լքող մարդկանց պահելու համար:

- Ժողովրդի քանակը օր օրի քչանում ու քչանալու է, բայց ընդհանուր առմամբ լարվածությունը կա, ուղղակի Ազատության հրապարակում հավաքվող մարդիկ այս պարագայում չեն հավատում իրենց առաջնորդին: Մենք պարտավոր ենք ե°ւ աղքատության, ե°ւ կոռուպցիայի, ե°ւ շատ այլ կարեւոր հարցերի դեմ պայքար մղել, անկախ նրանից այս շարժումը մարելու է, թե՝ ոչ, որովհետեւ մենք ինքներս գիտենք, որ այս ժամանակահատվածի մեր տնտեսական գործունեությունը պետք է ուղղված լինի նաեւ ժողղովրդի այդ հատվածի բարեկեցությունը ապահովելուն:

Եթե ՙժառանգությունը՚ համարում է, որ ունի ռեսուրս, որ կարող է ստվերային կառավարություն ունենալ, ու որ կարող է երկիր ղեկավարել, ապա շատ ակտուալ կլինի, որ պատրաստվի Երեւանի ավագանու ընտրություններին ու պատրաստվի ոչ թե հարթակներում: Ու, եթե կարողանա այդ ռեսուրսը հավաքել, կամ գոնե ցույց տալ որեւէ ճանապարհ, որն իրատեսական է, ոչ թե էմոցիոնալ ֆոնի վրա: Մարդիկ սպասում են կոնկրետ քայլերի ու կոնկրետ լուծումների: Եթե մարդ միայն լսում է գեղեցիկ բառեր ու ոչինչ չասող հայտարարություններ նա, իհարկե, կարող է հիասթափվել:

- Ի տարբերություն նախագահական ընտրությունների, Երեւանի ավագանու ընտրություններում ՙԺառանգություն՚ կուսակցությունն ավելի մե՞ծ թափով կգործի ու առաջատար դիրքեր կզբաղեցնի, թե՞ ճիշտ հակառակը:

- Ես կարծում եմ, որ կլինի ճիշտ հակառակը: Ի տարբերություն ՀՀ նախագահի ընտրությունների, տարբեր քաղաքական ուժեր ներկայանում են իրենց ցուցակներով եւ հստակ է, որ իրենք իրենց ետեւից կտանեն այն էլեկտորատը ու այն մարդկանց, ովքեր պետք է ընտրեին իրեն: ՙԺառանգության՚ համար այս դեպքում եւս ամեն ինչ գնում է դեպի փակուղի, քանի որ տեսնում են, թե ինչ արդյունքներ կգրանցնեն, ու մարդկանց այս բորբոքումը, շարժումը, սրացումները ոչինչ չեն տա, քանի որ նրանք չունեն լուծումներ, եւ ամեն ինչ ձգձգվում է: Թեկուզեւ Ազգային ժողովում տեսնում ենք, որ իրենց փոքրիկ խմբակցությունը ոչ թե իրավական պահանջներով կամ լուծումներով է հանդես գալիս, այլ  ներկայանում են ավելի շատ էմոցիոնալ հայտարարություններով:

- Քաղաքակիրթ երկրներում հացադուլը քաղաքական պայքարի միջոց չի ընկալվում, ի՞նչ եք կարծում, ինչո՞վ է պայմանավորված հենց այս պայքարի միջոցը, չէ՞ որ դա անլուրջ մոտեցում է հարցին:

- Ի վերջո, այո, ես էլ եմ այդ մտքին: Կարծում եմ, որ քաղաքական գործիչը միայն շատ ծայրահեղ դեպքերում պետք է այդ  քայլին գնա: Սկսած 88-ից հացադուլներ էին  լինում, սակայն դրանք բացարձակապես այլ ոլորտի էին վերաբերում: Այո, հացադուլը քաղաքակիրթ երկրներում ընդունված մեթոդ չէ, կարծում եմ, միտված է անորոշությունից որեւէ բան փոխելու, եւ դա չկարողանալուց է դիմել այս քայլին: Նա պետք է մտածի ու լուրջ որոշումներ կայացնի: Այլեւս ժամանակ չկա այդ ձեւով հարց լուծելու:

- Անգամ Հովիկ Աբրահամյանն այցելեց պարոն Հովհանիսյանին, արդյո՞ք սա եւս հարցի լուծման մի ձեւ չէր:

- Փաստը մնում է փաստ, որ մեր նախագահի տոլերանտության շնորհիվ է, որ այսքան ժամանակ լսում է բողոքավորներին: Իշխանությունները բաց են ու պատրաստ են քննարկումների, եթե դրանք լինեն տրամաբանության շրջանակներում:

- Տիկին Աճեմյան, փորձենք կտրվել ընդդիմությանը վերաբերող հարցերից ու անդրադառնանք ՙՀրապարակ՚ թերթում ձեր մասին գրված մի հոդվածի, որտեղ նշվում էր, թե Դուք, որպես պատգամավոր, հակասահմանադրական ու ՙսեքսիստական՚ քայլերի եք գնում: Ի՞նչ կասեք այս մասին, արդյո՞ք ՙսեքսը՚ հակասահմանադրական քայլ է:

- Չեմ ցանկանա մանրանալ, ուղղակի կնշեմ, որ կինը կին չի լինի, եթե առնվազն տասը կին նրան չնախանձեն: Կասեմ, որ ես՝ որպես ԱԺ պատգամավոր, ցանկանում եմ ոչ թե կանանց, այլ ուժեղ տղամարդկանց երկիր, որ ոչ թե ոտնահարենք տղամարդկանց իրավունքները կամ ցանկանանք իրենց տեղը գրավել, այլ լինենք մեր դերում: Ես երջանկություն եմ ցանկանում այն բոլոր կանանց, ում անձնական կյանքը չի դասավորվել, որպեսզի չկենտրոնանան այլ կանանց անձնականի վրա: Ես ամեն օր այնքան շատ բարի խոսքեր ու հաճոյախոսություններ եմ լսում իմ մասին, որ նկարագրելու չէ: Ի վերջո ես այն մադկանցից չեմ, ովքեր Ազգային ժողովում պատմում են ու գոռգոռում իրենց գործունեության մասին: Միգուցե, ես քիչ եմ  խոսել իմ կողմից ներկայացված ծրագրերի ու գործունեության մասին, կարծում եմ, առիթ կլինի նաեւ այդ մասին ԱԺ-ում կխոսեմ: Ես բաց աշխատանք եմ սիրում՝ թե° Ազգային ժողովում, ու թե° այն լրագրողների հետ, որոնք ինձ կսիրեն կամ ճիշտ հակառակը:

ՍՈՍԵ ՉԱՆԴՈՅԱՆ

Մեկնաբանել


Անվտանգության կոդ
Վերաբեռնել

TOP 20

Վերջին մեկնաբանվածները

Նորություններ

Արդեն կրպակներում

Հումոր

humor

levgroup

poqrikner.am

poqrikner

Miss & Mister Z

miss-z

Коллекции КП

Մեր էջը Facebook-ում