livemarks sitemap
Երկուշաբթի, Հունվարի 20, 2020

ՙԶարուհու՚ աչքից չի վրիպել ՙԺառանգություն՚ կուսակցության հացադուլավոր նախագահ Րաֆֆի Հովհաննիսյանի ջերմ կողմնակից, միշտ աչքի ընկնող ակտիվիստ, բլոգեր Իզաբելլա Աբգարյանի առաջարկած ռեալիստական բարեփոխումների ցանկը, ինչը վերջինս ներկայացրել է իր անձնական բլոգում:

Ըստ բլոգերի, ասպարեզում բազմաթիվ ոգեւորողներ կան, բայց արդյունքում բոլոր հարվածները ստացողը Րաֆֆի Հովհաննիսյանն է, ինչի համար առաջարկում է ՙԺառանգության՚ առաջնորդին պայքարել հարկային, մաքսային լծակների, հակամենաշնորհային կոմիտեի, այդ ոլորտում համապատասխան օրենսդրական փոփոխությունների համար: Ինչպես նաեւ առաջարկում է խորհրդարանը ցրելու պահանջը մեկ տարով հետաձգել, մինչ այդ ընտրական օրենսդրության եւ սահմանադրական բարեփոխումներ իրականացնել:

Վերոնշյալ չափավոր բարեփոխումների պահանջի եւ Ազատության հրապարակում տիրող իրադրության մասին, ՙԶարուհին՚ զրուցեց ԻԶԱԲԵԼԼԱ ԱԲԳԱՐՅԱՆԻ հետ:

-Տիկին Աբգարյան, Րաֆֆի Հովհաննիսյանի կողմնակիցների շրջանակում Ձեր տեսակետները կիսողների թիվն աճո՞ւմ է, թե՞ նվազում:

- Այդ տեսակետը զուտ իմ անձնական տեսակետն է եւ որպես միտք երկու-երեք օր է, ինչ իմ գլխում շրջանառվում է: Չեմ կարող ասել, թե որեւէ մեկը կիսում է այդ տեսակետը:

- Դուք բլոգում նշել էիք, որ եթե այս մասին բարձրաձայնեք Ազատության  հրապարակում, այն բացասաբար կընդունվի Ր.Հովհաննիսյանի կողմնակիցների շրջանում:

- Այո, վստահ եմ, որովհետեւ հիմնականում ժողովուրդը, որը գալիս է, ուզում է ամբողջովին իշխանափոխություն եւ առաջին հերթին նախագահի փոփոխություն:

- Իսկ եթե այդ տեսակետները, հենց պարոն Հովհաննիսյանը հնչեցնի, այդ ժամանա՞կ էլ բացասաբար կընդունվի միտինգավոր հանրության կողմից:

- Հարցը այն է, որ պարոն Հովհաննիսյանը այս տեսակետը պետք է նախ ինքը կիսի, նոր հայտարարի դրա մասին, բայց մենք այսօրվա դրությամբ նման հռետորաբանություն չենք լսում նրանից:

- Նրան արդեն ներկայացրե՞լ եք Ձեր առաջարկները:

- Ոչ, դա զուտ իմ գաղափարն է, որը ցանկացել եմ իմ ընկերների հետ կիսել, դրա համար էլ գրառում եմ կատարել իմ բլոգում:

- Ըստ Ձեզ, ի՞նչ պետք է անել, որպեսզի հրապարակում տարբեր ծայրահեղությունների կողմնակից խմբերը չկարողանան դրության տերը դառնալ:

- Փառք Աստծո, պարոն Հովհաննիսյանին այսօր հաջողվում է դա անել: Եվ, վերջիվերջո, վերջնական խոսքի համար բոլորը միշտ մոտենում են նրան եւ անձամբ հարցնում` դա Դո՞ւք եք կազմակերպել անձամբ, թե՞ ուրիշն է կազմակերպել: Կարեւոր է, որ դա մարդկանց համար նշանակություն ունի եւ, ամեն դեպքում, գալիս, մոտենում եւ կարծիք են հարցնում հենց կոնկրետ պարոն Հովհաննիսյանից կամ իր մերձավորներից:

- Ապրիլի 8-ին նախատեսված ՙմեկ միլիոնանոց երթի՚ մասնակիցների ֆեյսբուքյան ցուցակը Դուք լքեցիք: Ինչո՞վ էր դա պայմանավորված, եւ ո՞վ կարող է լինել դրա թիկունքում կանգնած:

- Դժվար է ասել, ով է թիկունքում կանգնած: Ես գիտեմ՝ ով է կազմակերպիչը. նա ռեժիսոր Արշակ Զաքարյանն է: Իհարկե, հասկանում եմ, որ տարբեր հասարակական հոսանքներ կամ անհատներ կարող են իրենց սեփական նախաձեռնությամբ հանդես գալ, բայց, ամեն դեպքում, ապրիլի 8-ին, այն էլ այդպիսի հավակնոտ վերնագրով միջոցառում կազմակերպելը, կարծում եմ, կհարվածեր ապրիլի 9-ի կարեւոր միջոցառմանը, որի մասին հայտարարվել է Ազատության հրապարակում, եւ որին նախապատրաստվում ենք:

- Հնարավո՞ր է, որ ապրիլի  8-ի երթը կապ ունի հենց նույն օրը Ադրբեջանում կայանալիք դեպի Աղդամ ՙխաղաղ երթի՚ հետ:

- Ճիշտն ասած, չեմ մտածել այդ ուղղությամբ, որովհետեւ կազմակերպիչը նշում է, որ սա ընդամենը ոչ քաղաքականացված քաղաքացիական նախաձեռնություն է: Այսինքն` սա քաղաքացիական ակցիա է, որի մասնակիցները պետք է լինեն քաղաքական ուժերը, որոնք պետք է անցնեն քաղաքացիական դրոշի ներքո:

- Ինչպե՞ս եք վերաբերում Ազատություն հրապարակում Նիկոլ Փաշինյանի ստվերային կառավարության 7 տասնյակ անդամների անունների հրապարակմանը, մանավանդ, որ այդ 70 անդամներից ում դիմել են լրագրողները, վերջիններս հրաժարվել են դրանից:

- Դուք կարդացել եք այսօր իմ անձնական տեսակետը իմ բլոգում, իսկ դա Նիկոլի անձնական տեսակետն է:

Այդ անունները նա անձամբ չի հնչեցրել, այլ անունների մեծ մասը հնչեցվել է ժողովրդի կողմից: Մարդիկ այնպիսի անուններ են հիշատակել, ովքեր իրենց կարծիքով   կարող են օգտակար լինել նոր Հայաստանին: Այսպես է եղել եւ, կարծում եմ, այն քննարկումները, որոնք այս պահին էլ ընթանում են հրապարակում, ընդամենը մտքերի փոխանակում են, իսկ վերջնական կարծիքը Րաֆֆի Հովհաննիսյանինն է:

- Վերոնշյալի հետ կապված որոշ կոչեր ու հայտարարություններ են հնչում, թե Նիկոլ Փաշինյանն անհայտ ուղղությամբ է տանում շարժումը եւ վերջինիս պետք է հեռացնել Ազատության հրապարակից:

- Ն. Փաշինյանը որեւէ տեղ չի տանում շարժումը: Չգիտեմ ով է դրա մասին խոսում. շարժումը հնարավոր չէ որեւէ տեղ տանել եւ այն ունի իր հիմնասյունը, որը Ր. Հովհաննիսյանն է, իսկ նա Ազատության հրապարակում է:

- Ի դեպ, Րաֆֆի Հովհաննիսյանի կողմնակիցներից Արման Մուշեղյանն իր ֆեյսբուքյան էջում գրառում է թողել` նշելով, որ, եթե երկրում օրենք չի գործում, հետեւաբար ապօրինություններ էլ չեն կարող տեղի ունենալ: Արդյո՞ք այս մոտեցումը ճանապարհ չէ դեպի անարխիա:

- Գիտեք, արդեն անարխիա է, եւ այն ձեւավորվել է շատ վաղուց: Դա պետք է մեր պաշտոնյաներն ու իշխանավորները հասկանային, երբ բոլոր օրենքների խախտմամբ Երեւանի կենտրոնում աղավաղվում էր Փակ շուկան: Սա արդեն անարխայի վառ դրսեւորում էր, քանի որ իրավապահները որեւէ մեկի ձեռքը չբռնեցին:

ՀՐԱՆՏ ՍԱՐԱՖՅԱՆ

Մեկնաբանել


Անվտանգության կոդ
Վերաբեռնել

TOP 20

Վերջին մեկնաբանվածները

Նորություններ

Արդեն կրպակներում

Հումոր

humor

levgroup

poqrikner.am

poqrikner

Miss & Mister Z

miss-z

Коллекции КП

Մեր էջը Facebook-ում