Հայուհի

Շատերն են Yutube-ում լսել ու հիացել կրակոտ մի աղջկա` Keyoh-ի կատարումներից: Բայց գուցե հիթային երգչուհին քչերին է հայտնի որպես իսկական հայուհի, ով կրելով Բելգիայի 'Միսս  Շոու-բիզնես' տիտղոսը ու լինելով բավական հայտնի Եվրոպայում` շարունակում է խոսել մաքուր հայերեն, պահպանել իր հայկականությունն ու բարձր պահել ծնողների պատիվը: 'Սփյուռքի հայուհու' ինքնատիպ կերպար փնտրելով` «Զարուհինե այս անգամ զրուցեց բելգիահայ երգչուհի ԿԱՐԻՆԵ ՕՀԱՆՅԱՆԻ (Keyoh) հետ:

- Ինչո՞ւ Օհանյանների ընտանիքը հայտնվեց Բելգիայում:

- 90-ական թվականներին շատ հայերի նման իմ ծնողներն էլ որոշեցին արտերկրում ապագա փնտրել, եւ այսպես մենք ընտանիքով հայտնվեցինք Բելգիայում:

- Կպատմե՞ք Ձեր ընտանիքի մասին:

- Ընտանիքս ինձ համար շատ թանկ է: Մենք միշտ համատեղ ենք գործում: Հարգելով եւ իրենց սիրելով` մինչ այսօր ապրում եմ նրանց հետ: Մեր տանը խոսում ենք միայն հայերեն եւ շատ հետաքրքրված ենք հայաստանյան կյանքով: Մայրս Գենտ քաղաքի հայկական բարեգործական դպրոցի հիմնադիր-տնօրենն է: Իր նպատակն է, որպեսզի հայ մանուկները չմոռանան հայությանն ու Հայաստանը: Ունեմ քույր եւ եղբայր, եւ բոլորս միասին անում ենք ամեն ինչ` օգնելու տեղի հայությանը:

- Մենք գիտենք նաեւ, որ  Դուք հայրենիքում ապրող հայերին էլ եք օգնում:

- Բարեգործության պատճառն իմ խիղճն է: Միակ բանը, ինչի համար ափսոսում եմ, այն է, որ առայժմ ավելին չեմ կարող անել:

- Երկար տարիներ ապրելով Բելգիայում` ո՞րն եք համարում Ձեր իսկական հայրենիքը:

- Իրողությունն այն է, որ ուր էլ գնամ, իմ հայ լինելը մնում է եւ փոխել հնարավոր չէ: Իսկ Բելգիան այն երկիրն է, որտեղ ես մեծացել եմ եւ իմ մտածելակերպն է ձեւավորվել:

- Հետաքրքիր է, ինչպե՞ս ընտանիքում ընդունվեց Ձեր շոու-բիզնեսյան կարիերան:

- Ընտանիքիս նպատակն է, որ երջանիկ լինեմ իմ կյանքում եւ հասնեմ բոլոր հաջողություններին, ինչին ինքս եմ ձգտում: Հայրս ինձ միշտ ասել է, որ շատ դժվար ուղի եմ ընտրել, որտեղ շատ փորձություններ կան եւ պետք է շատ աշխատել եւ ուժեղ լինել:

- Դուք մեծ հաջողություններ եք ունեցել մոդելային ասպարեզում, ո՞րն է Ձեզ հարազատ մոդելի՞նգը, թե երգարվեստը:

- Երկուսն էլ ինձ օգնել են հայտնի դառնալ: Շոու-բիզնեսի աշխարհում մեկը մյուսին լրացնում է:

- Ինչպես Հայաստանում, այնպես էլ Բելգիայում համոզված ենք, որ ունեք բազմաթիվ երկրպագուներ, որոնցից շատերը կերազեին Ձեր կողքին լինել, իսկ Դուք ինչպիսի՞ տղամարդ եք պատկերացնում Ձեր կողքին:

- Ով ինձ, պարզապես, կհասկանա եւ կսիրի…

- Ձեր կողքին պատկերացնո՞ւմ եք միայն հայ ամուսին, թե նա կարող է լինել եվրոպացի:

- Ինձ համար տարբերություն չկա:

- Կարինե Օհանյան գեղեցկուհին մշտապես փայլում է բեմերից, իսկ տա՞նը:

- Օրինակ, ծնողներս տարբերությունը շատ չեն զգում: Ես մանկուց բեմական տրամադրության մեջ եմ, եւ դրան սովոր են բոլորը:

- Ո՞ր դեպքում կհամաձայնեիք ապրել Հայաստանում:

- Ամեն դեպքում, պատրաստ եմ հայաստանյան բեմերում էլ երգել: Ես սիրում եմ իմ երկիրը եւ մեր հայերին: Եվ առիթը երբեք չեմ կորցնում, ամեն տեղ ասելով, որ հայ եմ: Կարծում եմ` այս կարճ ժամանակաշրջանում շատ բան եմ արել Հայաստանի համար` ինձ ներկայացնելով որպես հայուհի: Շատ մարդիկ, ում հետ շփվել եմ Եվրոպայում, անգամ Հայաստանի տեղը չգիտեին:

- Իսկ շա՞տ են տարբերվում բելգուհիները հայուհիներից:

- Մարդկային հարաբերությունների մեջ այդքան մեծ տարբերություն չեմ զգում, ուղղակի կենսամակարդակն է տարբեր:

-  Ասում են` Եվրոպայում այսօր բարքերը շատ են փոխվել` այլասերվածություններն օր օրի շատանում են, ինչպիսի՞ն է, ըստ Ձեզ, իրական պատկերը:

- Այլասերվածություն ամենուր կա, իհարկե, Եվրոպայում մարդիկ ավելի բաց են, ինչի համար էլ խոսում ու քննադատում են նրանց:

-  Այսօր ի՞նչ երազանքներ ունի կայացած երգչուհին:

- Իմ երազանքն է` երազանքներիս իրականանալը (ծիծաղում է-Հ. Ս.):

- Իսկ մաղթանքների ու խորհուրդների փոխարեն…

- Եթե, իրոք, ինչ-որ նպատակ ունես եւ ուզում ես հասնել այդ նպատակին, ուրեմն կողքից ոչ մի նեգատիվ խորհուրդ քեզ պետք չէ:

Զրույցը` ՀՐԱՆՏ ՍԱՐԱՖՅԱՆԻ