livemarks sitemap
Չորեքշաբթի, Հոկտեմբերի 16, 2019

relationshipsԸնտանեկան փոխհարաբերությունները զարգացման մի քանի փուլ են անցնում եւ վաղ թե ուշ ընտանեկան հարաբերություններում ճգնաժամ է լինում: Հոգեբանները համարում են, որ հարաբերությունները չեն կարող զարգանալ առանց դրա:

Ահա այն նշանները, որոնք բնորոշ են ճգնաժամին.

• Հարաբերությունները առաջվանը չեն, չկա նախկին ռոմանտիզմը:

• Միտք է առաջանում, որ ընտրել եք ոչ ճիշտ մարդու:

• Չկա ցանկություն զուգընկերոջը ուրախություն պատճառելու, հարաբերություններում հաճելի պահեր մտցնելու:

• Կոնֆլիկտները դարձել են հաճախակի:

• Կոնֆլիկտները առաջանում են առանց զգալի պատճառի:

• Միմյանց վիրավորելու եւ դիտողություններ անելու ցանկություն է լինում:

• Չկա առաջվա կիրքը: Սեքսուալ հարաբերությունները դառնում են պարտականություն:

• Խոսակցություններն ընտանիքում սահմանափակվում են կենցաղային հարցերով, երեխաներով եւ ընդհանուր շահերով:

• Կա ցանկություն` տնից հեռու գտնվելու եւ զվարճանքներ փնտրելու դրսում:

Եթե այս թվարկածներից 4-ը համընկնում են, ապա Ձեր կյանքում սկսվել է ճգնաժամային շրջան:

Ինչպիսի ճգնաժամեր են լինում ընտանիքում, որոնք են այն գործոնները, որոնք կյանքի այդ փուլում են ներազդում ընտանիքի միասնության վրա: Հոգեբանները առանձնացնում են 5 ճգնաժամային շրջան:

1-2 տարիների ճգնաժամ.

Բաժանությունների մեծ մասը այս շրջանում է լինում:

Ամուսնությունից հետո զույգը մտնում է որակապես ուրիշ հարաբերությունների մեջ: Շատ անգամ կորում է սիրահարվածության ուժեղ զգացումը, որը շատ վախեցնում է նորապսակներին: Այդ փուլում դեռ բացակայում է «մենք»-ը, դա ավելի նման է երկու «ես»-ի միասնության: Սովորությունների եւ արժեքների տարբերությունը պատճառ են դառնում առաջին ընտանեկան վեճերի: Յուրաքանչյուրը փորձում է փոխել դիմացինին, միեւնույն ժամանակ պահպանել իր անհատականությունը: Հայկական շատ նորաթուխ ընտանիքներ իրենց ամուսնական կյանքը սկսում են ամուսնու ընտանիքում: Եվ եթե անգամ ապրում են առանձին, ապա յուրաքանչյուր ծնող պարտավոր է «հոգալ» իր երեխայի համար: Խորհուրդներ տալ, սովորեցնել` ինչպես հարաբերություն ստեղծել, կոնֆլիկտային իրավիճակներում ինչպես պահել իրենց: Քիչ չեն դեպքերը, երբ հարաբերություններին խառնվում են բարեկամները, ընկերները:

Ամուսնական կյանքի առաջին տարին զույգի համար օգտակար է առանձին ապրելը եւ այդ շրջանում երեխա ունենալու հետաձգումը, քանի որ դա նույնպես սթրես է:

3-4 տարիների ճգնաժամ.

Այս շրջանում արդեն զույգը բավականին փորձառություն է անցել: Անցել է սիրահարվածության շրջանը, երբ մարդիկ իդեալականացնում են միմյանց եւ զույգը տեսնելով դիմացինի թերությունները` փորձում է ուղղել դրանք: Բացի դա` այդ շրջանը հաճախակի համընկնում է երեխաներ ունենալու եւ նրանց դաստիարակությամբ զբաղվելու հետ: Մեծանում է ֆինանսական եւ ֆիզիկական ծանրաբեռնվածությունը:

Կինը զբաղված է երեխաներով եւ կենցաղային հոգսերով, ամուսինը` գումար վաստակելով: Արդյունքում զույգն իրար հետ քիչ ժամանակ է անցկացնում:

Այս շրջանում մեծ դեր են խաղում կողքի կարծիքը: Հայկական իրականության մեջ քիչ չեն դեպքերը, երբ զույգը բաժանության եզրին է կանգնում կողքի միջամտությունների պատճառով: Ծնողները, ընկերները, հարազատներն ու բարեկամները փորձելով «օգնել»` տալիս են խորհուրդներ, որոնք խորացնում են զույգի մեջ առաջացած լարվածությունը: Օրինակ. սկեսուրը ամեն անգամ առիթ է ման գալիս մատնանշելու հարսի սխալները, համեմատելու մյուսների հետ, բարձրացնելու տղայի արժանիքները` միեւնույն ժամանակ հարսին արժեզրկելով տղայի մոտ:

Այս ամենում կան ենթագիտակցական եւ գիտակցական դրդապատճառներ, որոնք կարող են լինել` կենցաղային կոնֆլիկտը, խանդը հարսի հանդեպ, կողակցի կամ սեփական ընտանեկան երջանկության պակասը, տղայի ընտանիքի վրա սեփական իշխանությունը տարածելու միտումը եւ այլն: Սա վերաբերվում է նաեւ ընտանիքի մյուս անդամներին եւ ընտանիքի ամենամտերմիկ միջավայրին:

Օգտակար է այս շրջանում ավելի շատ իրար համար ժամանակ գտնելը: Ընտանեկան հոգսերը իրար հետ կիսելը: Ոչ վաղ անցյալի ռոմանտիկ հիշողություններ արթնացնելը: Եվ ուրիշներին թույլ չտալ Ձեր ընտանեկան փոխհարաբերությունների մեջ մտնել:

5-7 տարիների ճգնաժամ.

Զույգը այս շրջանում բավականին հարմարված է, ծանոթ է զուգընկերոջ սովորություններին: Սակայն չկա ռոմանտիկ կապ, կորել է հետաքրքրությունը զուգընկերոջ հանդեպ: Ընտանեկան կյանքը դարձել է ձանձրալի: Խոսակցությունները ծավալվում են նույն սցենարով: Կոնֆլիկտները հաճախակի են լինում: Ընտանեկան դավաճանությունների մեծ մասը այս շրջանում են պատահում, քանի որ զույգը հետաքրքրություն է ման գալիս դրսում: Տղամարդիկ նոր ռոմանտիկ կապ են փնտրում, կանայք նոր զբաղմունք (օրինակ` աշխատանք, եթե երկար ժամանակ տանը երեխայի խնամքով է միայն զբաղվել):

Օգտակար է նորություններ մտցնել ինտիմ կյանքում, քանի որ ավելի շատ ռոմանտիկայի պակասը եւ իրարից հագեցվածությունն են լինում ճգնաժամի պատճառը:

11-13 տարիների ճգնաժամ.

Ընտանիքը մեծ ճանապարհ է անցել, հաղթահարել է մեծ դժվարություններ: Հաճախ մեծ դժվարություններից հետո զույգը ցանկություն չի ունենում շարունակելու համատեղ կյանքը: Կարծես այն հիշեցնում է միայն դժվարությունները: Այս շրջանը համընկնում է նաեւ կյանքի ճգնաժամին, երբ զույգը վերաիմաստավորում է իր կյանքը: Փորձում է լրացնել բացթողումները: Արտաքին ազդեցությունները այս փուլում ամենաքիչն են հանդիպում:

Օգտակար է դնել մի այնպիսի նպատակ, որը հավասար հետաքրքրություն կառաջացնի ընտանիքի բոլոր անդամների մոտ: Հետաքրքիր դարձնել ինտիմ կյանքը, չվախենալով նորություններից:

20 տարվա ճգնաժամ.

Ավելի հաճախ այս ճգնաժամը այն ընտանիքներին է բնորոշ, որոնց համատեղ կյանքը կառուցված է եղել երեխաների շուրջ: Երբ երեխաները արդեն մեծ են եւ հոգատարության եւ խնամքի կարիք չունեն, նրանց համար անիմաստ է դառնում իրար հետ ապրելը: Ավելի շատ այս շրջանում բաժանվում են տղամարդիկ եւ փորձում են գտնել իրենց համար նոր զուգընկեր, որը կլցնի կյանքը նոր իմաստով:

Զույգը կարող է գնահատել այս շրջանի առավելությունները, (որ երեխաներն արդեն մեծ են եւ իրենք կարող են իրար համար շատ ժամանակ տրամադրել) եւ, իրականացնեն չիրագործված ցանկությունները, ճանապարհորդեն, նոր գործունեություն ստեղծեն:

Ի դեպ կոնֆլիկտները շատ անգամ կառուցողական են լինում, քան քայքայիչ: Եթե նայենք կոնֆլիկտներին որպես խնդիրները վեր հանող միջոց եւ հասկանանք, որ մինչեւ բացահայտ դառնալը այն զույգերից մեկի (եթե ոչ երկուսի) մոտ ներքին անհանգստություն եւ դիսկոմֆորտ է առաջ բերել, ապա կկարողանանք վարքում եւ մտադրություններում շտկումներ մտցնել եւ պահպանել ընտանիքի միասնությունը:

Մեր իրականության մեջ հաճախակի են դարձել բաժանությունները: Թեւածում է կարծիք, որ զույգը անհամատեղելի է, դրա համար էլ անխուսափելի է բաժանությունը: Սակայն մի քանի տարի առաջ նույն այդ զույգը համատեղելի էր, ինչու հանկարծ դարձան անհամատեղելի: Վերջացա՞ն զգացմունքները, էլ չկա՞ն համատեղ նպատակներ, թե էլ չկա փոխադարձ պատասխանատվություն: Չէ՞ որ ընտանիքը սիրո եւ պատասխանատվության վրա է հիմնված:

Սիրելի կանայք, ներկայացնում եմ կանոններ, որոնց պահպանումը չի վերացնի ճգնաժամը, բայց այն հեշտ հաղթահարելի կդրաձնի եւ կօգնի պահպանել ընտանիքում սիրո, երջանկության եւ համերաշխության մթնոլորտ:

  • CoupleCrisis iStock_000010897546Small-300x199

    Եթե նեղացել եք ամուսնու պահվածքից, փորձեք այդ մասին ասել նրան մի հարմար պահի, հանգիստ ձայնով, առանց կոնֆլիկտ առաջացնելու: Ուղղակի ասեք, թե նրա որ պահվածքն է Ձեզ վիրավորել: Հնարավոր է` նա չի էլ զգացել, որ Ձեզ նեղացնում է:

  • Մի մերժեք նրան ինտիմ հարաբերություններում միայն նրա համար, որ նեղացած եք, մի փորձեք այդ ճանապարհով պատժել նրան: Տղամարդիկ շատ են կարեւորում ինտիմը, եւ դա նրանց կհեռացնի Ձեզանից:

  • Եթե կոնֆլիկտ է ծագել, մի շտապեք վիրավորել եւ քննադատել, այլ հարմար պատճառով հեռացեք կոնֆլիկտից, կամ դադարեցրեք այն, իսկ հետո հարմար պահի, երբ ամուսինը պատրաստ է զրույցի բռնվել, քննարկեք պրոբլեմը, հարցրեք պատճառների մասին, խոսեք Ձեր զգացումների մասին:

  • Հարգեք Ձեր ամուսնու հետաքրքրությունները, կյանքի հայացքները: Դժվարին պահին եղեք նրա կողքին, խրախուսեք ու քաջալերեք նրան:

  • Մի փորձեք փոխել նրան, սահմանափակեք նրա ազատությունը, ընդունեք նրան այնպիսին, ինչպես կա, եւ նա կպատասխանի նույն կերպ: Իսկ եթե ոչ, հիշեցրեք, որ դուք իրար հավանել եք հենց այնպես ինչպես կաք:

  • Եթե Ձեր ամուսինը հետաքրքրվում է ուրիշ կանանցով: Փորձեք հասկանալ ինչն է հատկապես գրավում նրան: Ձեր մեջ զարգացրեք այդ հատկանիշները եւ նա ուշադրություն կդարձնի միայն Ձեզ:

  • Հետեւեք Ձեր տեսքին: Տղամարդկանց համար հաճելի է իրենց կողքին տեսնել խելացի եւ սիրուն կնոջ:

Յուրաքանչյուր ընտանիքում էլ խնդիրներ եւ պրոբլեմներ առաջանում են, դժվարին պահերին հարկավոր է հիշել, որ դուք սիրել եք այդ մարդուն, գնահատել նրա լավ հատկանիշները: Անցել եք փորձությունների միջով եւ դարձել իրար հարազատ: Եթե այդպես էլ չէ, ապա գիտակցեք, որ նա բոլորի միջից ձեզ է ընտրել, որպես կյանքի ընկեր, ուստի եթե դուք համաձայնել եք նրա հետ կիսել Ձեր կյանքը, պատրաստ եղեք Ձեր վրա պատասխանատվություն վերցնել ամուր պահել այդ միությունը, ջերմություն մտցնել հարաբերություններում: Երջանիկ մարդիկ են դառնում այն երեխաները, ովքեր ունեն երջանիկ ծնողներ: Եղեք երջանիկ, սիրված եւ սիրող:

Հոգեբան` ԱՆՆԱ ԳԱԼՍՏՅԱՆ

Մեկնաբանել


Անվտանգության կոդ
Վերաբեռնել

TOP 20

Վերջին մեկնաբանվածները

Նորություններ

Արդեն կրպակներում

Հումոր

humor

levgroup

poqrikner.am

poqrikner

Miss & Mister Z

miss-z

Коллекции КП

Մեր էջը Facebook-ում