livemarks sitemap
Երկուշաբթի, Հոկտեմբերի 21, 2019

altՏարիներ առաջ Հայաստանը «համարվում»էր մրցանակների երկիր եւ մշակույթի գրեթե բոլոր ճյուղերը ոչ թե մեկ այլ մի քանի մրցույթներ ու մրցանակաբաշխություններ էին անցկացնում, իսկ վերջում, բնականաբար, մրցանակակիրները` գոհ, իսկ մնացածները դժգոհ հեռանում դահլիճից: Հիմնականում դա տեղի էր ունենում Հանրային հեռուստաընկերության կողմից կազմակերպած «Ազգային երաժշտական մրցանակաբաշխության» ժամանակ:

Վերջին անգամ անցկացված «Ազգային երաժշտական մրցանակաբաշխություն 2012»-ից նույնպես քիչ չէր «նեղացածների» քանակը: Այս տարի մրցանակաբաշխությունը դեռեւս չի կայացել, շատերը դա կապում են անցյալ տարվա անվանակարգերում ընդգրկված, բայց այդպես էլ մրցանակի բերկրանքը չտեսած «նեղացածների», իսկ մի մասն էլ` Հանրային հեռուստաընկերության ղեկավարության փոփոխության հետ:


«ԱԶԳԱՅԻՆ ԵՐԱԺՇՏԱԿԱՆ ՄՐՑԱՆԱԿԱԲԱՇԽՈՒԹՅՈՒՆՆ» ԱՅՍ ՏԱՐԻ ՉԻ ԿԱՅԱՆԱ»

Սակայն «Զարուհու» հետ զրույցում Հանրային հեռուստատեսության երաժշտական եւ զվարճալի ծրագրերի պրոդյուսեր եւ «Թաթա պրոդաքշնի» գլխավոր պրոդյուսեր ԳՐԻԳՈՐ ՆԱԶԱՐՅԱՆԸ հավաստիացրեց.
- Այո, լինելու է, ուղղակի հիմա հեռուստատեսության նոր եթերաշրջանի հետ կապված` զբաղվածություն ունենք, ինչի համար էլ ձգձգվում է: «Ազգային երաժշտական մրցանակաբաշխությունն» անպայման կայանալու է: Իսկ նախագիծը կա եւ կյանքի կկոչվի ավելի լուրջ եւ ավելի հեղինակավոր կերպով: Ներկայում մշակվում է ճիշտ ձեւաչափը: Ուղղակի պետք է ավելի լավ կազմակերպել: Շուտով կլինի մրցանակաբաշխությունը:
- Այսինքն` այս տարի սպասե՞նք մրցանակաբաշխությանը:
- Այս տարի` ոչ, բայց հնարավոր է` հաջորդ տարվա սկզբում լինի: Շուտով հստակ կհայտարարենք այդ մասին:


Գ. Նազարյանից պարզեցինք, որ շուտով Թաթա Սիմոնյանը հանդես կգա նոր երգով. «Նոր երգ է թողարկվելու, նոր ձայնասկավառակի աշխատանքներն է ընթանում: Մի քանի օրից կթողարկվի ՙՔայլ ձիով՚ ֆիլմի երգը Թաթայի կատարմամբ, որն անվանվել է ՙՉի կարելի՚, շատ լավ երգ է»:


«ՄԻՍՍ ՀԱՅԱՍՏԱՆ ՄՐՑՈՒՅԹԸ ԿԿԱՅԱՆԱ ՄՅՈՒՍ ՏԱՐԻ»

altԵրկարատեւ դադարից հետո անցյալ տարվա անցկացրած «Միսս Հայաստան» մրցույթի ու «Միսս Հայաստան» տիտղոսակրի մասին ժպիտով հիշում եւ խոսում են մինչեւ այսօր: Ուստի, դրանից հետո կազմակերպիչները որոշել են այլ կերպ մոտենալ հարցին: Այս տարի չի կայանա գեղեցկության մրցույթը, բայց «Միսս Հայաստան» ազգային գործակալության տնօրեն ԿԱՐԵՆ ԱՐԻՍՏԱԿԵՍՅԱՆԻՑ «Իրավունքը» փորձեց պարզել պատճառները:
- Այս տարի չի լինելու մրցույթը, բայց, հավանաբար, այս տարի կանցկացնենք «Միսս Երեւան»մրցույթը:
- Այսինքն` մրցույթը անվանափոխվելո՞ւ է:
- Ոչ, մենք «Միսս Երեւան» 2004-ին էլ ենք անցկացրել: Ծրագիր ունենք, որ մարզերում էլ անցկացնենք մրցույթ «Միսս Երեւան»,«Միսս Տավուշ»... հետո նոր անցնենք «Միսս Հայաստան» մրցույթին, քանի որ այդպես խորքային կերպով կլինի աղջիկների ներգրավումը մրցույթին: Ավելի լավ կլինի, որ բոլոր մարզերը մասնակցեն, այդպես ավելի մեծ թափ կունենա մրցույթը:
- Փաստորեն, այս տարի մրցույթը չի լինի, բայց հաջորդ տարի...
- Մյուս տարի անպայման կլինի, սկզբում կսկսենք մարզային մրցույթները, մինչեւ մյուս տարվա ապրիլ-մայիս ամիսները: Ուղղակի ուզում ենք մոտեցումները փոխել, որպեսզի ավելի բարձր մակարդակով անցնի, որպեսզի մարզերը ներգրավված լինեն, եւ մի քիչ էլ բարի մթնոլորտ առաջանա մրցույթի շուրջը:


«ԱՅՎԱԶՅԱՆԱԿԱՆ ՓԱՌԱՏՈՆԸ ԿՐԿԻՆ ՀԵՏԱՁԳՎՈՒՄ Է»

altՆոյեմբերին Երեւանում հավանաբար կանցկացվի արձակագիր, դրամատուրգ, հրապարակախոս, սցենարիստ, ռեժիսոր, խմբագիր եւ գեղանկարիչ ԱՂԱՍԻ ԱՅՎԱԶՅԱՆԻՆ նվիրված «Այվազյանական  թատերական փառատոնը», որն առաջին անգամ անցկացվել է 2010 թվականին, երբ գրողի մահից հետո Այվազյանի տիկնոջ ԳՐԵՏԱ ՎԵՐԴՅԱՆ-ԱՅՎԱԶՅԱՆԻ ջանքերով ստեղծվեց միջոցառումների ցանկ, որն իր մեջ ներառում էր ոչ միայն փառատոն, այլեւ գրողի ստեղծագործությունների ընթերցումները` նպատակ ունենալով ոչ միայն քարոզել նրա ստեղծագործությունները, այլեւ ձեւավորել որոշակի դաշտ այդ ստեղծագործությունների համար: Ինչպես նախորդ անգամ, այս տարի եւս փառատոնը կտեւի մոտ մեկ շաբաթ, բացումից անմիջապես հետո ամբողջ յոթ օրերի ընթացքում տարբեր թատերական խմբեր կցուցադրեն Այվազյանի ստեղծագործությունները: Խոսելով Այվազյանի եւ նրա ստեղծագործություններից` Գրետա Վերդյան-Այվազյանն ընդգծեց, որ Աղասի Այվազյանը ոչ միայն իրեն է պատկանում, այլեւ ողջ հայ ժողովրդին: Նրա ստեղծագործությունները` նույնպես, բայց, ցավոք, այսօր իսկ իրենք փաստի առաջ են կանգնած, քանի որ դեռեւս անհայտ է, թե որտեղ կանցկացվի փառատոնը: Միայն հայտնի է, որ փառատոնի բացումը տեղի կունենա Հ.Պարոնյանի անվան երաժշտական կոմեդիայի պետական թատրոնում:
Նախատեսված է եղել փառատոնը անցկացնել գարնանը, սակայն միջոցներ եւ աջակցություն չունենալու պատճառով հետաձգվել է մինչեւ հոկտեմբեր, որից հետո կրկին նույն խնդիրները... եւ կրկին հետաձգվում է, այս անգամ մինչեւ նոյեմբերի 11-ը:
Գ. Վերդյանի խոսքերով նախորդ փառատոնին պետական աջակցությունը այդքան մեծ չի եղել, անցկացվել է այն կառույցների օգնությամբ, որոնց նա ինքն է դիմել: Այս տարի արդեն տիկին Գրետան դիմել է մի քանի պաշտոնական կառույցների եւ հույս ունի, որ աջակցություն կլինի` փառատոնը պատշաճ ձեւով անցկացնելու համար:
Այս տարի ՀՀ մշակույթի նախարարությունը գումար է տրամադրել ոչ թե  փառատոնը անցկացնելու, այլ մի թատրոնի` Աղասի Այվազյանի ստեղծագործությունը բեմադրելու համար:

ԼԻԼԻԹ ԵՂԻԱԶԱՐՅԱՆ
ԶՎԱՐԹ ԽԱՉԱՏՐՅԱՆ

Մեկնաբանել


Անվտանգության կոդ
Վերաբեռնել

TOP 20

Վերջին մեկնաբանվածները

Նորություններ

Արդեն կրպակներում

Հումոր

humor

levgroup

poqrikner.am

poqrikner

Miss & Mister Z

miss-z

Коллекции КП

Մեր էջը Facebook-ում